બનાસકાંઠા જિલ્લાના વેપારી મથક ડીસામાં લોકોના આરોગ્ય સાથે ચેડાં કરતાં તત્વો સામે ફૂડ એન્ડ ડ્રગ્સ વિભાગે મોટી કાર્યવાહી હાથ ધરી છે. ડીસાના હીરા બજાર વિસ્તારમાં આવેલી એક દુકાનમાં શંકાસ્પદ ઘીનું વેચાણ થતું હોવાની બાતમીના આધારે આરોગ્ય વિભાગે દરોડા પાડી લાખો રૂપિયાનો મુદ્દામાલ જપ્ત કર્યો છે.

બ્રાન્ડેડ નામે નકલી ઘીનો ખેલ

તપાસ દરમિયાન હીરા બજારની દુકાનમાંથી ‘હાસ્ય’, ‘ગૌરસ’ અને ‘જયમુલ’ જેવી જાણીતી લાગે તેવી બ્રાન્ડના નામે પેકિંગ કરેલું શંકાસ્પદ ઘી મળી આવ્યું હતું. ફૂડ એન્ડ ડ્રગ્સ વિભાગે કુલ 929 લિટર શંકાસ્પદ ઘી સીલ કર્યું છે, જેની અંદાજિત કિંમત 6,14,995 રૂપિયા જેટલી થાય છે. આ ઘી શુદ્ધ છે કે ભેળસેળિયું તે જાણવા માટે વિભાગે સેમ્પલ લઈને લેબોરેટરી પરીક્ષણ અર્થે મોકલી આપ્યા છે.