ભારતીય જનતા પાર્ટી (BJP) એ પશ્ચિમ બંગાળ વિધાનસભા ચૂંટણી માટે પોતાના ઉમેદવારોની પ્રથમ યાદી જાહેર કરી છે. આ પ્રથમ યાદીમાં કુલ 144 ઉમેદવારોના નામ સામેલ છે. પાર્ટીએ સુવેન્દુ અધિકારીને નંદીગ્રામ અને ભવાનીપુર બંને બેઠકો પરથી ઉમેદવાર બનાવ્યા છે. આ બંને બેઠકો પશ્ચિમ બંગાળની મુખ્યમંત્રી મમતા બેનર્જી સાથે સંકળાયેલી માનવામાં આવે છે.

2021ની વિધાનસભા ચૂંટણીમાં સુવેન્દુ અધિકારીએ નંદીગ્રામ બેઠક પરથી મમતા બેનર્જીને હરાવ્યા હતા. ત્યારબાદ મમતા બેનર્જીએ ભવાનીપુર બેઠક પરથી પેટાચૂંટણી જીતીને વિધાનસભામાં વાપસી કરી હતી. ભવાનીપુર બેઠક તૃણમૂલ કોંગ્રેસ (TMC) નું મજબૂત ગઢ માનવામાં આવે છે. મમતા બેનર્જી 2011 થી 2021 સુધી સતત અહીંથી ધારાસભ્ય રહ્યા હતા.

ભાજપે ડાયમંડ હાર્બર બેઠક પરથી દીપક કુમાર હાલદારને ટિકિટ આપી છે. આ વિસ્તાર મમતા બેનર્જીના ભત્રીજા અભિષેક બેનર્જીના લોકસભા ક્ષેત્રમાં આવે છે. હાલમાં અહીંથી TMCના પન્નાલાલ હાલદાર ધારાસભ્ય છે. ઉપરાંત ભાજપે બંગાળ ભાજપના પૂર્વ અધ્યક્ષ દિલીપ ઘોષને ખડગપુર સદર બેઠક પરથી ઉમેદવાર બનાવ્યા છે.

બંગાળ પહેલા ભાજપે કેરળ વિધાનસભા ચૂંટણી માટે પણ પોતાની પ્રથમ યાદી જાહેર કરી છે. પાર્ટીએ 140 બેઠકોમાંથી 47 ઉમેદવારોના નામ જાહેર કર્યા છે. ભાજપે રાજ્યના અધ્યક્ષ રાજીવ ચંદ્રશેખરને નેમોમ બેઠક પરથી ઉમેદવાર બનાવ્યા છે. રાજીવ ચંદ્રશેખર 2024ની લોકસભા ચૂંટણીમાં તિરુવનંતપુરમ બેઠક પરથી કોંગ્રેસના સાંસદ શશિ થરૂર સામે હારી ગયા હતા.

પશ્ચિમ બંગાળની રાજકીય સ્થિતિ

પશ્ચિમ બંગાળમાં મમતા બેનર્જી સતત ત્રણ વખતથી મુખ્યમંત્રી તરીકે કાર્યરત છે. જો 2026ની વિધાનસભા ચૂંટણીમાં TMC જીતે, તો મમતા બેનર્જી સતત ચોથી વખત મુખ્યમંત્રી બની શકે છે. આવું કરનાર તેઓ દેશની પ્રથમ મહિલા નેતા બની શકે છે.

તમિલનાડુની પૂર્વ મુખ્યમંત્રી જયલલિતાના નામે પાંચ વખત મુખ્યમંત્રી બનવાનો રેકોર્ડ છે, જોકે તેઓ 1991 થી 2016 વચ્ચે અલગ-અલગ કાર્યકાળમાં મુખ્યમંત્રી રહ્યા હતા.

કેરળની રાજકીય સ્થિતિ

કેરળ દક્ષિણ ભારતનું એકમાત્ર રાજ્ય છે જ્યાં હાલમાં પણ લેફ્ટ ડેમોક્રેટિક ફ્રન્ટ (LDF) સત્તામાં છે. અહીં સામાન્ય રીતે દરેક ચૂંટણીમાં સત્તા બદલવાની પરંપરા રહી છે, પરંતુ 2021માં LDFએ સતત બીજી વખત સરકાર બનાવી આ પરંપરા તોડી હતી.

ભાજપ હજુ સુધી કેરળ વિધાનસભામાં એક પણ બેઠક જીતવામાં સફળ થયું નથી. જોકે છેલ્લી લોકસભા ચૂંટણીમાં ભાજપે ત્રિશૂર બેઠક જીતી હતી. ઉપરાંત ડિસેમ્બર 2025માં ભાજપે પ્રથમ વખત તિરુવનંતપુરમ નગર નિગમની ચૂંટણી પણ જીતી હતી.

ચૂંટણી પંચની તૈયારીઓ

ચૂંટણી પંચ (ECI) એ જણાવ્યું કે ચૂંટણી રાજ્યોમાં 5,173થી વધુ ફ્લાઈંગ સ્ક્વોડ તૈનાત કરવામાં આવ્યા છે જેથી ફરિયાદો પર 100 મિનિટની અંદર કાર્યવાહી કરી શકાય. આ ઉપરાંત 5,200થી વધુ સ્ટેટિક સર્વેલન્સ ટીમો (SST) પણ તૈનાત કરવામાં આવી છે.

પશ્ચિમ બંગાળમાં 23 એપ્રિલ અને 29 એપ્રિલે મતદાન થશે. જ્યારે કેરળ અને આસામમાં 9 એપ્રિલે એક જ તબક્કામાં મતદાન થશે. તમિલનાડુમાં 23 એપ્રિલે મતદાન યોજાશે અને પુડુચેરીમાં પણ 9 એપ્રિલે મતદાન થશે.

આ ઉપરાંત ગોવા, ગુજરાત, કર્ણાટક, મહારાષ્ટ્ર, નાગાલેન્ડ અને ત્રિપુરાની છ બેઠકો પર પેટાચૂંટણી પણ યોજાશે. ચૂંટણી પંચે જણાવ્યું કે ચારેય રાજ્યો અને પુડુચેરીમાં મતોની ગણતરી 4 મેના રોજ થશે.