પાકિસ્તાન ક્રિકેટમાં ઈંગ્લેન્ડ પ્રવાસ દરમિયાન મોટો વિવાદ સર્જાયો છે. પૂર્વ પાકિસ્તાની કેપ્ટન મિસ્બાહ ઉલ હકે પાકિસ્તાન ક્રિકેટ બોર્ડની રાષ્ટ્રીય સિલેક્શન કમિટીમાંથી રાજીનામું આપ્યું છે. આ નિર્ણય ઈંગ્લેન્ડ સામેની ટેસ્ટ સિરીઝ દરમિયાન PCB દ્વારા ટીમમાં કરવામાં આવેલા મોટા ફેરફારો બાદ આવ્યો છે. જોકે ઉપલબ્ધ અહેવાલો અનુસાર PCBએ હજુ સુધી મિસ્બાહનું રાજીનામું સત્તાવાર રીતે સ્વીકાર્યું નથી.

મિસ્બાહનો આ નિર્ણય PCB દ્વારા ટેસ્ટ ટીમમાં અચાનક કરવામાં આવેલા ફેરફારો બાદ આવ્યો છે. ઈંગ્લેન્ડ સામેની સિરીઝમાં સતત બે પરાજય બાદ PCBએ ટીમમાં મોટો ફેરફાર કર્યો હતો. બોર્ડે સાત ખેલાડીઓને ટીમમાંથી બહાર કરીને ઘરે પરત મોકલ્યા હતા. તેમાં પૂર્વ કેપ્ટન મોહમ્મદ રિઝવાન અને સલમાન અલી આગા ઉપરાંત ઈમામ ઉલ હકનો પણ સમાવેશ થાય છે.

PCBએ મુખ્ય કોચ સરફરાઝ અહમદ અને બોલિંગ કોચ ઉમર ગુલને પણ તેમની જવાબદારીઓમાંથી હટાવ્યા હતા. વ્હાઇટ બોલ ટીમના કોચ માઇક હેસનને ઈંગ્લેન્ડ મોકલવાનો નિર્ણય લેવામાં આવ્યો છે જ્યારે એશ્લી નોફ્કેને બોલિંગ કોચની જવાબદારી આપવામાં આવી છે. ત્રીજી ટેસ્ટ માટે કેટલાક નવા અને અનકૅપ્ડ ખેલાડીઓને ટીમમાં સામેલ કરવામાં આવ્યા છે.

અહેવાલો અનુસાર મિસ્બાહને ટીમમાંથી સાત ખેલાડીઓને હટાવવાના નિર્ણય અંગે પૂરતી ચર્ચામાં સામેલ કરવામાં આવ્યા નહોતા. આ બાબતને લઈને તેમણે નારાજગી વ્યક્ત કરી હતી અને ત્યારબાદ સિલેક્શન કમિટીમાંથી રાજીનામું આપવાનો નિર્ણય કર્યો. મિસ્બાહે નેશનલ ક્રિકેટ એકેડમીમાં બેટિંગ કન્સલ્ટન્ટ તરીકેની ભૂમિકા છોડવાનો નિર્ણય પણ લીધો છે.

મિસ્બાહ માર્ચ 2026માં પાકિસ્તાનની સિલેક્શન કમિટીમાં સામેલ થયા હતા. તે પહેલાં તેઓ પાકિસ્તાન ટીમના કેપ્ટન અને મુખ્ય કોચ તરીકે પણ મહત્વની જવાબદારી નિભાવી ચૂક્યા છે. હવે ઈંગ્લેન્ડ પ્રવાસ દરમિયાન તેમના રાજીનામાથી પાકિસ્તાન ક્રિકેટ બોર્ડના નિર્ણય અને ટીમ મેનેજમેન્ટને લઈને ચાલી રહેલા વિવાદમાં વધુ વધારો થયો છે.

પાકિસ્તાન હાલમાં ઈંગ્લેન્ડ સામેની ત્રણ મેચની ટેસ્ટ સિરીઝમાં 0 થી 2થી પાછળ છે. ત્રીજી અને અંતિમ ટેસ્ટ 9 સપ્ટેમ્બરથી બર્મિંઘમમાં રમાવાની છે. આ મેચ પહેલાં PCB દ્વારા કરવામાં આવેલા મોટા ફેરફારો અને મિસ્બાહના રાજીનામાને કારણે પાકિસ્તાન ક્રિકેટમાં સંકટ વધુ ઘેરાયું છે.