જાપાનમાં યોજાનારી એશિયન ગેમ્સ 2026માં ક્રિકેટ ટીમોની રહેવાની વ્યવસ્થાને લઈને વિવાદ સામે આવ્યો છે. ભારત અને પાકિસ્તાન સહિત કેટલાક મોટા ક્રિકેટ બોર્ડ્સે ખેલાડીઓ માટે આપવામાં આવેલી હોટલ અને અન્ય સુવિધાઓ અંગે ચિંતા વ્યક્ત કરી હતી. ખાસ કરીને હોટલના રૂમનું કદ અને ક્રિકેટ કિટ તથા સામાન સાથે બે ખેલાડીઓના એક રૂમમાં રહેવા અંગે સવાલ ઉઠાવવામાં આવ્યા હતા.

આ મામલે જાપાન ક્રિકેટ એસોસિએશનના CEO નાઓકી એલેક્સ મિયાજીએ સ્પષ્ટતા કરી છે કે એશિયન ગેમ્સમાં ભાગ લેનારી ક્રિકેટ ટીમોને આયોજકો તરફથી હોટલની વ્યવસ્થા આપવામાં આવી રહી છે. જોકે જો કોઈ ટીમ આ વ્યવસ્થાથી સંતુષ્ટ ન હોય તો તે પોતાની પસંદગી મુજબ અલગ હોટલ બુક કરી શકે છે.

હોટલને લઈને સૌથી મોટો સવાલ તેની મેદાનથી દૂરી અંગે છે. ક્રિકેટ ટીમો માટેની નિર્ધારિત હોટલ નિશિન શહેરના કોરોગી સ્પોર્ટ્સ પાર્કથી આશરે 20 કિલોમીટર દૂર હોવાનું જણાવવામાં આવ્યું છે. કેટલાક ક્રિકેટ બોર્ડ્સે આ અંતર અને મુસાફરીની વ્યવસ્થા અંગે પણ ચિંતા વ્યક્ત કરી હતી.

ખેલાડીઓ માટે ટોયલેટની સુવિધાને લઈને પણ ચર્ચા થઈ હતી. કેટલાક અહેવાલોમાં દાવો કરવામાં આવ્યો હતો કે ખેલાડીઓને ટોયલેટ માટે મેદાનથી લગભગ 500 મીટર દૂર જવું પડી શકે છે. જોકે મિયાજીએ આ વાતને સ્પષ્ટ રીતે નકારી છે. તેમણે જણાવ્યું કે ખેલાડીઓના વિસ્તારમાં જ ટોયલેટની સુવિધા ઉપલબ્ધ રહેશે. મેદાન પર અસ્થાયી અને કાયમી બંને પ્રકારની સુવિધાઓ ઉપલબ્ધ રહેશે.

મિયાજીના જણાવ્યા અનુસાર એશિયન ક્રિકેટ કાઉન્સિલ અને એશિયન ગેમ્સની આયોજન સમિતિ છેલ્લા એક વર્ષથી ક્રિકેટ માટેની સુવિધાઓ અંગે સાથે મળીને કામ કરી રહી છે. તેમણે કહ્યું કે મર્યાદિત સમય અને ઉપલબ્ધ જગ્યાની પરિસ્થિતિ વચ્ચે ખેલાડીઓ અને અધિકારીઓને શક્ય તેટલી આરામદાયક સુવિધા આપવાનો પ્રયાસ કરવામાં આવ્યો છે.

આ વખતે એશિયન ગેમ્સમાં પરંપરાગત ખેલાડીઓનું વિલેજ બનાવવામાં આવ્યું નથી. આયોજકોએ ખેલાડીઓ અને અધિકારીઓ માટે હોટલ ઉપરાંત અસ્થાયી લાકડાના આવાસ અને ક્રૂઝ શિપ જેવી વ્યવસ્થાઓ પણ કરી છે. OCA અને AINAGOCએ અગાઉ જણાવ્યું હતું કે જુલાઈમાં નોંધાયેલા તમામ 17000થી વધુ ખેલાડીઓ અને અધિકારીઓ માટે યોગ્ય રહેઠાણની વ્યવસ્થા કરવામાં આવી છે.

ક્રિકેટની વાત કરીએ તો એશિયન ગેમ્સમાં ભારત પુરુષ અને મહિલા બંને વર્ગમાં ભાગ લેશે. ભારતીય મહિલા ટીમ 18 સપ્ટેમ્બરે યજમાન જાપાન સામે પોતાની શરૂઆત કરશે જ્યારે શ્રેયસ અય્યરની આગેવાની હેઠળની ભારતીય પુરુષ ટીમ 28 સપ્ટેમ્બરે ક્વાર્ટર ફાઇનલથી અભિયાન શરૂ કરશે.

જાપાન ક્રિકેટ એસોસિએશનને આશા છે કે એશિયન ગેમ્સમાં એશિયાની ટોચની ક્રિકેટ ટીમોની હાજરીથી જાપાનમાં ક્રિકેટને મોટો પ્રોત્સાહન મળશે અને ટૂર્નામેન્ટ સફળ રહેશે.